*إسكريبت بعنوان صعيدي مع مذيعة مِن القاهرة: لقاء مع صعيدي*
_السلام عليكم ي حـاج
-وعليكم السلام ي بنتي
_ممكن أسجل معاك لقاء
-أه طبعًا إتفضلي
_ممكن الأول كدا تعرفني بنفسك
-أنا الحاج مسعود مِن الصعيد محافظه سوهاج وبشتغل هنا في القاهرة
_ربنا يسعد أيامك ي حاج وتشرفت بيك
-الله يكرمك ي بنتي إتفضلي
_بص ي حاج أنا هسألك شوية أسئلة كدا بقي على الصعيد وتجاوبني تمام
-تمام يلا قولي بسم الله
_أول سؤال: هل ي حاج الصعايدة جاهلين زي ما الوجة البحري بيقول عليكم؟
-الصعيـد وجهلة طب حتى والله ي بنتي الكلمتين مش لايقين علي بعض خالص خالص بصي في مقوله بتقول وإن لم يجدواا فيك عيبًا كسوك مِن عيوبهم وعابوك، دا الصعيد أرض الكرم عمرك شوفتي صعيدي ندل؟
عمرك شوفتي صعيدي قليل الأصل طبعًا إلا مَن رحم ربي ف الي حابب أوصلهولك إنهم لأ مش جاهلين إحنا عندنا تعليم عالي والطفل الصعيدي معروف إنه أذكي طفل في مصر وللعلم خرج مِن عندنا قامات وأشخاص مهمة في الدولة وعلماء وإعلاميين ودكاترة وشعراء مثلًا زي عبدالباسط عبدالصمد ومحمد صديق المنشاوي وعباس العقاد وطه حسين وعبدالرحمن الأبنودي ومصطفي لطفي المنفلوطي وهدى شعراوي ومحمد سيد طنطاوي وهشام الجخ وغيرهم كتير وفي الأخر بيتهمونا بالجهل والتخلف طب إزاي بس ي بنتي؟
وعندنا ناس بتفهم في الأصول والجدعنه ودا شيء يكفي والله دا إحنا عندنا الضيف يتشال فوق راسنا شيلا ولما نبقي بناكلوا مِن أراضينا وبنشرب اللبن مِن مواشينا يبقي إحنا بردواا متخلفين ورجعيين؟
إحنا الصعايده مختلفين آه لكن متخلفين لأ ومش جاهلين أبدًا.
_طيب ي حاج السؤال التاني:عندكم بناتكم وحريمكم مش بتخرج وبتلبس لبس أسود ف أسود دايمًا؟
-مين قال كده بس دا إحنا حريمنا بتلبس الأزرق والأحمر والوردي وكل حاجة، لكن جوا بيتها مش بره عشان إحنا رجالة بنغير عاى عرضنا وبناتنا تاج راسنا وبيلبسوا كل إللي نفسهم فيه وبيسافروا ألا صحيح تعرفي أنا عندي بنتي دكتورة جات القاهرة هنا كتير عشان كليتها وأهو عندنا كل شيء بيحصل وكل حاجه تمام بس الفرق بقي إحنا عندنا كل حاجه بحدود لبس بحدود مشي بحدود سفر بحدود عندنا مبادئ وقيم وأخلاق ومش معني إننا حافظين كلام ربنا وساترين بناتنا يبقي إحنا متخلفين.
_طب ي حاج السؤال التالت:عندكم قتل وكلام من دا وأخد طار وكدا.
-أيوه عندنا لكن مش كل الناس كدا مش كل الناس بتقتل وبتاخد طارها إحنا إتقدمنا آه السلاح موجود لكن عشان دي عادات عندنا مِن صغرنا لكن مش بنستخدمواا في الأذية إلا مَن رحم ربي بردواا.
_طيب ي حاج إي وضعية العيشة عندكم ف الصعيد؟
-أحسن عيشه وإحنا محليين عيشتنا وأرضنا وناس طيبة كداا وعندنا بلادنا هادية وخالية مش زحمه ودوشة يعني حياتنا بسيطه وناس راضية بحالها وبتتعب عشان تعيش فكرك إننا بنتعب عشان نجيب فلوس وبس لا لا خالص إحنا بنتعب عشان نعمر أماكنا إحنا خيرنا مغرقنا بس إحنا بنحب الشغل والحركة إتعودنا على كدا مِن صغرنا وبنحب الجنية الحلال وراضيين بحالنا ومعندناش أطفال متشردة رغم ضعف الحالات المادية عند بعض الناس بس الحمدلله الكل مستور وعيشتنا أحسن من ناس كتيرة أوي.
_طب بخصوص لُغتكم ي حاج؟
- علي فكره إحنا مش كُلنا لهجة واحدة إحنا كل مكان فينا يختلف عشان فينا اللي إتغرب في إسكندرية وفي القاهرة وفي السعودية وفي الإمارات وفي كل مكان في العالم عشان كدا مش لهجتنا واحدة إحنا لهجتنا تضم فيها ميـة لهجة وبردوا بنحب لغتنا وبنفتخر فيها مع إنها متختلفش عنكم يعني كبندر أو ك بحراويين.
_طب ي حاج اي ف رأيك السبب الي خلي الناس تاخد فكره مش لطيفة عنكم.
-السبب الأول والأخير هو المسلسلات الممثلين بيأدواا الصعايدة بدور مقزز أوي وإحنا مش كدا خالص شوهو سمعتنا بمسلسلاتهم دي والغلط الأكبر إن الناس بتاخد بالمسلسلات وتغلط وتتكلم وتقول من غير متعاشر الصعايده أصلاً.
_طيب ي حاج معروف عن الصعايدة تقفيله الدماغ؟
-بصي ي بنتي تقفيلة الدماغ دي تحمل مسئولية مش غباء خالص والناس أخدت فكرة إن دا غباء وناس صعبه وناس مش بتتفاهم وناس بيها وعليها لا إحنا ناس طيبه وجدعة بس المسلسلات اللي برزت النقطه دي بردوا في العقول تقفيله الدماغ دي بتخلينا نختار الحاجة صح وبنفضل مصرين عليها عشان هيا الصح وإحنا قدها وهنعملها يعني بنقضواا الأمور بشكل صح عشان قدها وقد أي مسؤلية وأي فعل هينتج عن تصرفنا وإختيارنا دا.
_طيب ي حاج عاداتكم وتقاليدكم في زواج البنات بدري؟
-بصي ي بنتي يمكن دي النقطة الوحيدة الي مش هعارضك فيها أوي بس هقولك حاجه أنتِ لو بصيتي للصعيد دلوقتي وزمان هتشوفي إن العادة دي بدأت تقل جدًا بس غالبًا الناس إللي بتجوز بناتها بدري دي بتكون عاوزة تأمن ليها مستقبل قبل متموت أو ناس تلاقيها مش قادرة على العيشة بسبب كُتر أولادهم ف بتتجوز وبتشيل حمل مِن عليها ودا مش غلط بس الغلط إننا نرمي بناتنا لأي حد وإحنا مش بنعمل كدا في مفيش أي شيء غلط بردواا وبنجوز بناتنا بدري بردوا عشان عارفين إنهم هيقدرواا يتحملواا المسئولية حتى لو لسه أطفال.
_طيب الموضة واللبس والكلام دا ي حاج ممكن بردواا الناس الي بره الصعيد واخدين فكرة وحشة عنكم مِن لبسكم وإن أغلبكم ناس قديمة ومفيش موضة وكدا؟
-بصي ي بنتي تولع الموضة يعني أنا أخلي بنتي تمشي ببنطلون متقطع وضيق وأقولهم معلش أصل دي الموضة أموت نفسي قبل م بنتي تجيبلي العار إحنا عارفين الموضة وعارفين كل حاجه سواء بقي مِن زيارتنا لأماكن بره الصعيد أو مِن النت أو مِن أي مكان ف مش جاهلين ولا حاجة خالص يعني وعارفين كل حاجه لكن اللغز بقي إننا متمسكين أوي بعاداتنا وتقاليدنا عشان كدا بنرفض الموضة وبنعتز بلبسنا وعاداتنا اللي الكل يتشرف بيها حقيقي الصعيد نعمة.
_تحب توجه جملة لأي حد بينتقد الصعيد؟
-أحب أقولهم متحكمووش على الصعيد غير لما تعاشروهم، متخدوش فكره وحشة علي الكل من معرفتك لإنسان واحد بس ف الصعيد مثلًا أو في حياتك عمتًا، عاشر وشوف وأعرف ومش من كلمه تقول دا الصعيد كذا كذا وبيها وعليها، جرب تتصفح وتشوف الصعيد وتعرف ناس من الصعيد وقتها بقي هتحبهم وجدًا كمان وهتعرف إن حبك للصعايدة مكسب ليك، عشان والله ي جماعه الصعيد نعمة.
*♡~~~~~~~~~~~~~~♡*
*لـ ندي صفوت(بنت الصعيد).*
*♡~~~~~~~~~~~~~~♡*
الوسوم:
اسكريبتات
لكي كامل الدعم والتقدير 💜
ردحذفدُمتي مبدعة 💜💜
كالعاده طبعا جميل جداً وزي ما ديما بقول مش جديد عليكي العظمه انتي تستاهلي كل المدح عااش جدا وكل الدعم
ردحذفوفقك الله استمري يا جميله
ردحذفكالعاده طبعا زى العسل وجميل مش جديد عليكى اصلا انتى كل حاجه بتعمليها بتبقى عظمه♥♥♥♥
ردحذف